Verifikasen blong ol nasonal ID kad long Luganville hemi mas redi bifo Sanma provinsol eleksen long manis blong March.

Acting Direkta blong Civil Registresen mo Identiti Manejmen (CRIM) Depatmen, Etienne Ravo i talem se wei fowod blong olgeta long Santo hemi blong jekem gud ol ID kad, blong mekem sua se nem long ID hemi stret long hemia long elektoral roll.

Folem amendmen blong loa blong elektoral, pipol bai i nomo usem blue mo red kad blong vote be bai oli usem nomo ol ID kad.

Mr Ravo i talem se tim i kam eli long Sanma blong ko aot long ol komuniti blong mekem sua se everi sitisen long Sanma we i kat 18 yia oli mas kat wan nasonal ID kad.

Hemia blong allowem olgeta i save castem vot blong olgeta long namba 14 March.

Director Ravo i talem se naoia oli targetem 5 eria kaonsel mo after long 15 January bai oli go long ol remot eria kaonsel.

Hemi se oli wok wetem ol volentia wei oli setap long ol diferen poling stasen long everi eria kaonsel.

Hemi talem se wanem we oli stap mekem long fil blong oli jekem ol rolls, taem ol sistisen oli kam oli jekem wetem ID kad mo blong jekem weta or no nem i stap long roll, Sapos nem i stap long roll, oli infomem sitisen ia se yes nem blo yu hemi stap long roll.

Mr Ravo i se spos oli jekem be nem i no stap long roll, bai oli addem nem iko insaed long elektoral roll.

Hemi talem se olgeta wei oli aot long narafala konstituency i kam long Sanma mo base long difren eria kaonsel, tim i stap mekem transfea blong olgeta tu i kam long Sanma konstituency.

Hemi apil long ol sitisen blong Sanma provins blong go long ol polling stasen blong ol ofisa oli jekem gud ID kad blong yu save exercisem raet we Constitusen hemi kivim blong save vot.

Eleksen blong Sanma provinsol Gavman bai i tekem ples long 14 March.

By Premilla Hinge