Classic Futbol Klab mo Koum Futbol Klab bae i ple seken stej blong VFF nasonal jampions lik 2023.
Luganville Futbol Asosiesen i talem se Campion klab Classic FC mo Torba Futbol Asosiesen jampion klab Koum FC nao blong ple semi faenol long Port Vila nekis wik.
Tufala jampion klab ia i sekiurim fes mo seken ples long Grup B mats long Luganville Soka City Stadium long wik ia long aelan blong Santo.
Wetem ol final mats blong Grup B we i bin tekem ples long wik ia i soem se Classic FC i kam blong winim Loran Futbol Klab blong Penama Futbol Asosiesen long 5-2 mo Tenuku Futbol Klab emi winim Koum FC long 3-2.
Mbe nomata long lus blong Koum FC, oli manej blong lid long gol difrens ova long Loran FC mo oli joinem Classic FC blong kompit long Port Vila.
Tufala jampion klab ia i sut kasem Port Vila samtaem long wik ia.
Long semak nius yet long VFF nasonal jampions lik bae i VFF Freswota Stadium i hostem ol Grup A mats long wiken ia.
PVFA jampion klab Ifira Blak Bird FC mbae i hostem M3 FC blong Tafea Futbol Asosiesen, Police FC blong Malampa Futbol Asosiesen mo Malampa FC blong Sanma Futbol Asosiesen.
Mo stret long wiken ia mbae fes mats blong Grup A mbae iko long aksen stret long VFF Freswota Stadium.
Long Satede 1pm mbae Police FC i ple wetem Malampa FC mo long 4pm Ifira Blak Bird FC i hostem M3 FC.
