Vanuatu Boxing Federesen (VBF) i mekem wan kam bak blong hem afta we hemi bin kwait blong sam yia.

Boxing hemi wan popula sport long Vanuatu long taem i kam, mo hemi prodiusum plante long olgeta top boxa, olsem Taika Shak blong Vanuatu we hemi Leit Philip Kating.

Mo hemi wan individuel sport we hemi karem plante medol long olgeta reginal kem olsem Pasifik Kem mo Pasifik Mini Kem

I tekem 7 yia we bifo Vanuatu Amata Boxing Asosiesen hemi stap long saspensem kasem las yia.

Wetem wan intaviu we VBTC Sports i mekem wetem karent presiden blong Vanuatu Boxing Federesen, Mr Jack Naran Beerbul hemi bin pointemaot wan long olgeta mein risen we federesen hemi bin foltaon long hem long sam yia i pass.

Beerbul i talem se taonfol blong federesen long taem we IBA (Intenasonal Boxing Asosiesen) i bin saspendem Vanuatu boxing folem olgeta manejmen isu blong hem.

“Taem mi kam presiden long 2022 mi mekem plante jenis, fes samting mi mekem riviu blong konstitusen blong boxing, jenjem nem I kam long Vanuatu Boxing Federesen, rejistarem federesen i ko long Vanuatu Fainansol seves komisen mo semtaem wok klosap wetem Vasanoc mo Osenia boxing konfederesen blong ko bak insait long IBA blong oli save karemaot saspensen blong Vanuatu Boxing, long taem ia we federesen i bin saspen long 2016”, Beerbul i talem long taem blong intaviu.

Hemi talem se afta we Vanuatu Boxing Federesen i ko bak insait long IBA,oli karemaot saspensen long Oktoba 2023 long las yia, mo long Novemba oli failem wan skwad we i ko long Pasifik kem long Solomon Aelan long mo presens blong federesen long intenasonal boxing kongress long Dubai.

VBF presiden hemi poentemaot se, yia ia, 2024 hemi yia blong putum fokas moa long trening, tru long wan niufala divelopmen ofisa we Vasanoc hemi apoentem, mo pepes blong wok blong hem hemi blong muv aroan long olgeta komiuniti blong ranem awenes.

Hemi samfala divelopmen we federesen hemi putum fokas long hem long yia ia, mo tu i kat ol trening sesen long FOL evri dei.

“Priperesen blong olgeta boxa naoia hemi tuwods Tafea Dei, we bae i lukim wan tunamen blong boxing bae i tekem ples long aelan blong Tanna nekis manis, hemi wan 3 dei ivent we evri boxa blong Tafea bae oli save patisipet long hem, mo tu pripersen tuwods Osenia boxing jampionsip long Tahiti long manis blong Novemba.

“Naoia we i stap bambae i no long taem federesen bae hemi karemaot wan niufala ring blong fait we hemi kam finis be oli no displeim yet , hemia hemi festaem we federesen hemi onem wan ring blong fait blong hem, apat long boxing ring we oli stap usum long FOL we hemi propeti blong Vanuatu sports komisen”, Presiden Beerbul i talem.

Presiden blong VBF hemi komentem tu olgeta boxa blong Vanuatu we oli bin ripresentem Vanuatu long Pasifik Mini Kem 2017 long hom kraon, taem hemi stap olsem team maneja mo olgeta boxa blong hem oli bin winim 9 medol, we hemi 5 kol medol 2 silva mo 2 brons, hemi wan gudfala rikod long pasifik taem Vanuatu hemi singim faef taem nasonal antem long korman  stedium.

Wetem wan kam bak we federesen hemi mekem, bambae oli statem blong rivaivem bakeken olgeta prokram blong olgeta mo tu bambae i kat plante kompetisen we bae oli ranem wetem niufala boxing ring blong olgeta.

“Wan pikfala jalenj blong federesen, taem i lukim wan pikfala namba blong olgeta boxa oli ko joinem Leba Mobiliti Prokram, we i kivim olgeta opotuniti blong ko wok long ovasi (Ostrelia mo Niu Zilan), mo hemia i afektem tu ol narafala sports disaplin tu ,mo ino kat inaf fanding mo sponsasip, mo tu olgeta veniu nblong trening bifo be naoia Vanuatu Sports Komisen i alawem mifala blong usum FOL blong trening,”Beerbul i talem.

Hemi pointemaot se, i kat plante sko blong ol woman oli save pefom long boxing, i bin kat tu female boxa be i nidim mo woman blong kam long trening we i stap long FOL mo i lukim wan namba blong olgeta yangfala we oli intres long sport ia, long taem blong skul kem long las yia.

Wan impoten isu tu we presiden blong federesen hei stresem, hemi promosen blong olgeta boxa hemi impoten.

“I kat samfala boxa we oli ko stap fait ovasi we oli no kamaot long federsesen, lo risen se sapos oli kasem wan pikfala kill, bambae oli blemem huia, federesen from oli ripresentem Vanuatu, be oli no ol profesonal boxa, sapos Lionel Warawara from hemi stap ko from PRO or Profesonal nao, so yumi mas promotem olgeta boxa blong yumi long federesen,” Presiden I talem folem fiu long olgeta boxa we oli ko stap fait ovasi we federesen i no sentem olgeta.