Wan eye survey long 2023 i faenem se plante man Vanuatu oli kat problem long eye o nosave lukluk from sik blong cataract mo sik sugar.

Cataract hemi wan sik we hemi mekem eye blong wan man nosave lukluk klia mo sik sugar hemi wan long nara samting we save mekem man i blind, hemi ol tu mein samting we save spolem eye blong man.

Aot long 100 pipol,10 pipol oli kat sik blong cataract mo hemia emi wanem we onli eye Dokta long kaontri, Dr Johnson Kasso i talemaot.

Dr Kasso i se sik ia i normal taem pipol i olfala mo i nid blong oli werem glass blong eye. 

“Wan long ol mein cos blong blindnes hemi cataract mo sik sugar; long survey we i kamaot ol majos cos blong blind from cataract hemi 10%, so aot long 100, 10 pipol oli no lukluk i klia tumas,” hemi talem.

Hemi talem se sik sugar hemi nara eye sik from pipol i no kontrolem gud sugar tru long kakae mo medesin.

“I gat fulap long yumi oli gat eye problem from diabetes so oli nidim tritmen be yumi save se i gat nomo long Vila.

“Notern Provins i nogat so sipos mifala i gat ol Kes mas riferem i ko long Vila. So hemi putum wan impotens blong ol equipmen ia i mas gat blong ol surronding provins oli gat akses mo blong stopem ol bigfala cost blong travel i ko long Vila.”

Impotens blong kakae helti hemi wan advaes we Dr Kasso i askem blong ol pipol i kalarem pleit blong kakae wetem kala blong reinbow we i fulap long ol aelan kakae mo frut.

“Vitamin A hemi fulap long wan ples, hemi fulap long ol grin lif vegetable olsem aelan cabij, nambalango o eni veggies we hemi grin,” Dr Kasso hemi talem.

“Naoia hemi taem blong avocado, sipos yu stap kakae vinis u ko hed nomo.”

Eye Dokta ia hemi talem moa se ol pipol mas werem sunglass blong heat blong sun i no spoilem eye tu.