Komuniti blong Ipota long Erromango oli soem resilens taem oli bildim wan niu tredisenol aos we hemi saeklon pruf wetem ol lokol material nomo.
Oli bildim wan spesel aos we oli singaotem “Nimo Norop” folem lokol save blong ol apu bifo mo bae hemi wan gud wei blong stap sef from saeklon.
Nimo Norop hemi luk difren long wan nomol natangura haus we i popula raon long Vanuatu.
Wetem ol strong saeklon we i damejem bigwan plante natangura mo semen haus tru aot long kaontri las yia, i pusum Erromango Cultural Association blong karembak lokol save, long saed blong bildim haus we i save stanap tru long wan saeklon.
Wan memba blong grup ia, Jonah Molou i talem se oli bildim Nimo Norop wetem 100% lokol material long aelan ia.
“Nimo Norop hemi wan kaen strakja we hemi bild daon, hemi bild lo, hemi stanap gud and hemi i gat ol ples we hemi gud type blo graon we i go klosap lo wan metre i ko insaed long graon.
“Sapos yu luk lo ol haus blo America lo Santo lo ol taem blo World War 2, ol haus hemi sem structa be hemi no tradisenol fashion.
“Wid blong hem hemi 7 metre and then length blo hem hemi around 11 to 12 metres mo insaed hemi save tekem 50 plus man.”
Komuniti blong Ipota hemi feswan blong kam tugeta mo help buildim fes Nimo Norop mo lonjem long manis ya mo Dillons Bay bae i lonjem seken wan long Februari, nekis manis.
Men tingting nao hemi blong serem save ya mo i kipim i sef evriwan long taem mo afta long wan saeklon.
“Ol man oli save lanem ol skil ia blo save mekem own blo olgeta we bae i save takem olgeta insaed lo taem blo saeklon so yu save go bak lo komuniti blo yu.
“Hemi not samting we bae yu pem, useum mani blo we yu pem, hemi ol resos we i stap nomo lo komuniti o ol aelan we yu save accessem hem.
“Haus hemi long gud taem mo long taem blo saeklon man, woman, pikinini, ol pipol with disabiliti, oli gat space insaed blo oli save haed in.”
Mr Molou i gohed mo serem sam tingting blong sam lokol we oli pat long projek ya.
“Wan mama hemi talem se mi mi neva luk aos ia bifo be naoia mi harem se, laef blong mi I sef nao wetem ol pikinini blong mi so taem i gat wan saeklon bae mifala go insaed.
“And then wan man bagegen hemi talem se, taem yu stap long wan modern aos bae yu fraet be kaen aos olsem bae harriken ino save brokem daon mo putum iko daon long graon.”
Erromango Cultural Association i wok klosap wetem Dipatmen blong Forestry long Tafea mo ol pipol long komuniti blong finism fes nimo norop. Mo Hae Komisen blong Canada long Australia nao i fundem projek ya.
